Flight ticket prices : ఇండిగో విమానయాన సంస్థలో తీవ్ర సంక్షోభం మళ్లీ ప్రయాణికులను కలవరపరుస్తోంది. పైలట్లు, క్రూ సిబ్బంది కొరత కారణంగా దేశవ్యాప్తంగా 500కి పైగా విమాన సర్వీసులు రద్దు చేయబడ్డాయి. ఈ రద్దులు తిరుపతి-హైదరాబాద్ మార్గంలో టికెట్ ధరలను ఒక్కసారిగా పెంచేశాయి. సాధారణంగా హైదరాబాద్, బెంగళూరు నుంచి తిరుపతికి రోజుకు 14 విమాన సర్వీసులు ఉంటాయి. కానీ గత ముగ్గురోజుల్లో మొత్తం 6 సర్వీసులు రద్దయ్యాయి. దీంతో మిగిలిన ఫ్లైట్లపై డిమాండ్ పెరిగి, టికెట్ ధరలు 2-3 రెట్లు పెరిగాయి.
హైదరాబాద్ రాజీవ్ గాంధీ అంతర్జాతీయ విమానాశ్రయంలో (RGIA) గురువారం (డిసెంబర్ 4) ఒక్కరోజే 72 ఇండిగో ఫ్లైట్లు రద్దయ్యాయి. తిరుపతి మార్గంలో రెండు ఫ్లైట్లు రద్దు కావడంతో, మిగిలిన ఒకటి లేదా రెండు సర్వీసుల టికెట్లు రూ. 5,000 నుంచి రూ. 12,000 వరకు పెరిగాయి. బెంగళూరు నుంచి తిరుపతికి కూడా 4 సర్వీసులు రద్దయ్యాయి. ఇండిగో సంస్థ ప్రకారం, ఫ్లైట్ డ్యూటీ టైమ్ లిమిటేషన్లు (FDTL) కొత్త నిబంధనలు అమలు చేయడంతో సిబ్బంది కొరత తలెత్తింది. దీనికి తాత్కాలిక పరిష్కారంగా, ఫిబ్రవరి 10 నాటికి పూర్తి సేవలు పునరుద్ధరించేందుకు DGCAతో చర్చలు జరుగుతున్నాయి.
JOIN FOR REGULAR UPDATES
