Pawan Kalyan : అమరావతిలో నిర్వహించిన జనసేన పార్టీ పదవి–బాధ్యత కార్యక్రమంలో డిప్యూటీ సీఎం, జనసేన అధినేత పవన్ కళ్యాణ్ పార్టీ నామినేటెడ్ పదవులు పొందిన నేతలు, వివిధ హోదాల్లో ఉన్న నాయకులతో విస్తృత స్థాయి సమావేశం నిర్వహించారు. ఈ సందర్భంగా ఆయన జనసేన భావజాలం, పార్టీ లక్ష్యాలు, సామాజిక సమానత్వం, బాధ్యతాయుత నాయకత్వంపై కీలక వ్యాఖ్యలు చేశారు.
సామాజిక వర్గాలకు ప్రాధాన్యం
కూటమి ప్రభుత్వం అధికారంలోకి వచ్చిన తర్వాత అనేక సామాజిక వర్గాలకు కార్పొరేషన్లు ఏర్పాటు చేసినట్టు పవన్ కళ్యాణ్ గుర్తు చేశారు. అదే విధంగా ‘రెల్లి’ సామాజికవర్గానికి కూడా ప్రత్యేక కార్పొరేషన్ అవసరమని స్పష్టం చేశారు. పట్టణ ప్రాంతాలకే కాకుండా గ్రామీణ ప్రాంతాల వారికి కూడా సముచిత అవకాశాలు కల్పించామన్నారు.
పదవికంటే బాధ్యత ముఖ్యం
“పదవి చిన్నదా పెద్దదా కాదు… బాధ్యత గొప్పది” అని పవన్ కళ్యాణ్ అన్నారు. పార్టీ కోసం కష్టపడ్డ ప్రతి ఒక్కరికీ న్యాయం చేయాలనే ఉద్దేశంతోనే పదవులు కేటాయిస్తున్నామని తెలిపారు. ప్రస్తుతం దాదాపు 4000 మంది జనసేన నేతలు వివిధ పదవుల్లో ఉన్నారని, ఇది తన వ్యక్తిగత విజయం కాదని, జనసేన భావజాలం, పోరాట పటిమకు నిదర్శనమని పేర్కొన్నారు.
ఓటమిలోనే నిజమైన నాయకత్వం
ఒక వ్యక్తిని గెలుపు లేదా సుఖాల్లో అంచనా వేయలేమని, ఓటమిలో ఎలా నిలబడతాడన్నదే నిజమైన కొలమానం అని పవన్ కళ్యాణ్ వ్యాఖ్యానించారు. పార్టీ ఓడిపోయిన సమయంలో కూడా నాయకులు, కార్యకర్తలు బలంగా నిలబడ్డారని, అందుకే నేడు వారికి పదవులు దక్కాయన్నారు. ఇంకా కొన్ని నామినేటెడ్ పదవులు త్వరలో రానున్నాయని వెల్లడించారు.
పార్టీ నిర్మాణం కష్టమైన ప్రయాణం
పార్టీ నిర్మాణం అనేది చాలా కష్టమైన ప్రక్రియ అని, అందుకే ఈ విషయాన్ని పదే పదే చెబుతున్నానని పవన్ కళ్యాణ్ అన్నారు. సాధారణంగా ప్రాంతీయ పార్టీలు ఎన్నికల కోణంలోనే ఆలోచిస్తాయని, కానీ దేశం కోసం పనిచేయాలనే తపనతోనే జనసేన పార్టీని స్థాపించానని చెప్పారు.
యువతకు ప్రజాస్వామ్య వేదికగా జనసేన
సమాజంలో సమస్యల వల్ల రక్తం మరిగిన యువతకు సరైన రాజకీయ వేదికలు లేకపోతే వారు నక్సలిజం వైపు వెళ్లే ప్రమాదం ఉందని పవన్ కళ్యాణ్ ఆందోళన వ్యక్తం చేశారు. అలాంటి యువతకు ప్రజాస్వామ్య పద్ధతిలో పోరాడే వేదికగా జనసేన ఉండాలన్నదే తన లక్ష్యమన్నారు.
కుల రాజకీయాలకు తావులేదు
“రెండు మూడు కులాలే శాసిస్తాం అంటే అది కుదరదు” అని పవన్ కళ్యాణ్ స్పష్టం చేశారు. తాను కులం కోసం పార్టీ పెట్టలేదని, ఒకే కులానికే పరిమితం చేస్తే తనకు చాలా బాధ కలిగేదని చెప్పారు. జనసేన భావజాలం విస్తృతంగా పెరుగుతుందే తప్ప తగ్గేది కాదని ధీమా వ్యక్తం చేశారు.
ఏడు సిద్ధాంతాలే జనసేన పునాది
జనసేన పార్టీని స్థాపించినప్పుడు నిర్ణయించుకున్న ఏడు సిద్ధాంతాల ప్రకారమే పార్టీ నడుస్తుందని పవన్ కళ్యాణ్ స్పష్టం చేశారు. గెలుపు, ఓటములు పార్టీ బలాన్ని నిర్ణయించవని, కష్టకాలంలో పార్టీ ఎలా నిలబడుతుందన్నదే అసలైన ప్రమాణమని ఆయన వ్యాఖ్యానించారు.
JOIN FOR REGULAR UPDATES
