Pawan Kalyan : రాజోలు నియోజకవర్గంలో డిప్యూటీ సీఎం పవన్ కల్యాణ్ పర్యటన సందర్భంగా రైతులతో చేసిన మాటలు వక్రీకరించవద్దని జనసేన పార్టీ హైకామాండ్ కీలక ప్రకటన విడుదల చేసింది. ఇరు తెలుగు రాష్ట్రాల మధ్య సుహృద్భావ వాతావరణం నెలకొన్న ఈ సమయంలో, పవన్ మాటలను తప్పుదోరికలు చేసి వివాదాలు రేకెత్తించవద్దని పార్టీ స్పష్టం చేసింది.
గత వారం డాక్టర్ బి.ఆర్. అంబేద్కర్ కోనసీమ జిల్లా, రాజోలు నియోజకవర్గంలో డిప్యూటీ సీఎం, జనసేన అధినేత పవన్ కల్యాణ్ పర్యటించారు. తెలంగాణ నాయకుల దిష్టి తగలడం వల్లే గోదావరి జిల్లాల్లో కొబ్బరిచెట్లు ఎండిపోతున్నాయన్న ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కల్యాణ్ వ్యాఖ్యానించారు. ఈ మాటలు తెలంగాణలో వివాదాస్పదంగా మారాయి. తెలంగాణ మంత్రి వాకిటి శ్రీహరి ఈ వ్యాఖ్యలపై తీవ్రంగా స్పందించి, “తలతిక్క మాటలు మానుకో” అంటూ హెచ్చరించారు. తెలంగాణ వనరులు వాడుకుని ఈ స్థాయికి ఎదిగిన పవన్, ఇప్పుడు రెండు రాష్ట్రాల మధ్య విద్వేషాలు రెచ్చగొట్టడం సరికాదని మంత్రి శ్రీహరి హితవు పలికారు.
డిప్యూటీ సీఎం పవన్ కల్యాణ్ వ్యాఖ్యలకు మంత్రి కోమటిరెడ్డి వెంకటరెడ్డి కౌంటర్ ఇచ్చారు. కోనసీమ గురించి తెలంగాణ ఉద్యమం జరగలేదన్నారు. నీళ్లు, నిధులు, నియామకాల కోసం జరిగిన తెలంగాణ ఉద్యమంపై అవగాహన లేకుండా మాట్లాడారంటూ కోమటిరెడ్డి వ్యాఖ్యానించారు. పవన్ వ్యాఖ్యల్ని తీవ్రంగా ఖండిస్తున్నానని అన్నారు. బేషరతుగా క్షమాపణలు చెప్పకపోతే తెలంగాణలో పవన్ కల్యాణ్ సినిమాలు ఆడవు.. రిలీజ్ కావు అంటూ మంత్రి కోమటిరెడ్డి తేల్చి చెప్పారు.
ఈ నేపథ్యంలో జనసేన పార్టీ హైకామాండ్ అధికారిక ప్రకటన విడుదల చేసింది. “పవన్ గారి మాటలు స్థానిక సమస్యలపై రైతుల అభివృద్ధి కోసం చేసిన వ్యాఖ్యలు మాత్రమే. వాటిని వక్రీకరించి, రెండు రాష్ట్రాల మధ్య సుహృద్భావాన్ని దెబ్బతీయాలని ప్రయత్నించవద్దు. ఇరు రాష్ట్రాల ప్రజలు అన్నదమ్ముల్లా కలిసి ఉండాలి. అనవసర వివాదాలకు దూరంగా ఉండాలి” అని ప్రకటనలో పేర్కొన్నారు. పవన్ వ్యాఖ్యలు వెనక్కి తీసుకోవాలని మంత్రి శ్రీహరి కోరినా, జనసేన ఈ మాటలు సందర్భానుసారంగా చేసినవేనని స్పష్టం చేసింది. ఈ వివాదం రాజకీయ వర్గాల్లో చర్చనీయాంశంగా మారింది. జనసేన ప్రకటన సుహృద్భావాన్ని కాపాడుకోవాలనే పవన్ ఉద్దేశ్యాన్ని స్పష్టం చేస్తూ, వక్రీకరణలకు దూరంగా ఉండాలని కోరింది. జనసేన ప్రకటన ఈ వివాదానికి తాత్కాలిక పరిష్కారంగా కనిపిస్తోంది.
JOIN FOR REGULAR UPDATES
