Ration Cards : రేషన్‌కార్డుదారులకు శుభవార్త.. జనవరి 1 నుంచి అవి ఫ్రీగా పంపిణీ..!!

Ration Cards : ఏపీలో రేషన్ కార్డు ఉన్నవారికి పౌరసరఫరాల శాఖ మంత్రి నాదెండ్ల మనోహర్ శుభవార్త అందించారు. జనవరి 1 నుంచి రాగులు మరియు గోధుమ పిండిని ఉచితంగా పంపిణీ చేస్తామని వెల్లడించారు. అలాగే, పీడీఎస్ బియ్యానికి క్యూఆర్ కోడ్ అమర్చే కొత్త విధానాన్ని జనవరి నుంచి అమలు చేస్తామని తెలిపారు. మధ్యాహ్న భోజన పథకం కింద రైతులు, మిల్లర్లు, గోడౌన్ల వివరాలను ట్రాక్ చేసేందుకు క్యూఆర్ కోడ్ ఆధారిత వ్యవస్థను ఏపీ మొదటి రాష్ట్రంగా అమలు చేసింది. ఉత్తర తీరప్రాంత జిల్లాల్లో ఆగస్టు 2025 నుంచి రాగి పంపిణీ ప్రారంభమైంది, 16,000 మెట్రిక్ టన్నులు పీడీఎస్ కింద అందుబాటులో ఉన్నాయి.

ఢిల్లీలో కేంద్ర పౌరసరఫరాల మంత్రి ప్రహ్లాద్ జోషిని కలిసిన మంత్రి నాదెండ్ల మనోహర్ మరియు కమిషనర్ సౌరభ్ గౌర్, ధాన్యం కొనుగోళ్లు, గోధుమలు, రాగుల సరఫరాపై చర్చించారు. జనవరి నుంచి గోధుమలు, రాగులను అదనంగా కేటాయించడానికి కేంద్రమంత్రి అంగీకరించారు. రైతులు దళారులకు ధాన్యం అమ్మకుండా ప్రభుత్వం ఇబ్బందులు లేకుండా కొనుగోలు చేస్తోందని సూచించారు. అరటి, ఇతర పంటల్లో అనుకోని దిగుబడి వచ్చిన నేపథ్యంలో కేంద్రానికి నివేదిక అందించామని, పొగాకు, మామిడి, పత్తి విషయంలో రైతులను ఆదుకుంటున్నామని తెలిపారు. సీఎం మంత్రులతో సబ్ కమిటీ ఏర్పాటు చేశారు, రాబోయే రోజుల్లో సంస్కరణలు తీసుకురానున్నామని వెల్లడించారు. పెట్టుబడుల కోసం భూ కేటాయింపులు, అమరావతిలో అవసరాన్ని బట్టి భూసేకరణ చేస్తున్నామని చెప్పారు.

2025-26 ఖరీఫ్ సీజన్‌కు కేంద్రం ఏపీకి 51 లక్షల మెట్రిక్ టన్నుల వరి లక్ష్యాన్ని కేటాయించింది. 25 రోజుల్లో 2.69 లక్షల రైతుల నుంచి 17.37 లక్షల మెట్రిక్ టన్నుల వరిని కొనుగోలు చేశామని, రోజువారీ సేకరణ 90,000 మెట్రిక్ టన్నులకు చేరుకుందని మనోహర్ తెలిపారు. రైతుల ఖాతాల్లో 24 గంటల్లో డబ్బులు జమ చేస్తున్నామని, 7 కోట్ల 87 లక్షల గోనే సంచులు అందించామని చెప్పారు. గత 15 రోజుల్లో 96,000 మెట్రిక్ టన్నుల 10% బ్రోకెన్ రైస్ డెలివరీ చేశామని, అన్ని రైస్ మిల్లులు పూర్తి సామర్థ్యంతో పనిచేస్తున్నాయని వివరించారు. సీఎమ్‌ఆర్‌ను సకాలంలో పంపిణీ చేస్తున్న ఏకైక రాష్ట్రం ఏపీ అని కేంద్ర మంత్రి ప్రహ్లాద్ జోషి ప్రశంసించారు. ఎఫ్‌సీఐ నుంచి అదనపు నిలవలకు అనుమతి ఇచ్చారని మనోహర్ పేర్కొన్నారు.