Sankranthi Special Trains : రైల్వే ప్రయాణికులకు శుభవార్త.. సంక్రాంతికి భారీగా ప్రత్యేక రైళ్లు..!!

Sankranthi Special Trains : సంక్రాంతి పండుగ సీజన్‌లో సొంతూళ్లకు వెళ్లే ప్రయాణికుల రద్దీని దృష్టిలో ఉంచుకుని దక్షిణ మధ్య రైల్వే (SCR) మరో 41 ప్రత్యేక రైళ్లను నడపనున్నట్లు ప్రకటించింది. ఇప్పటికే కొన్ని స్పెషల్ ట్రైన్స్ ప్రకటించిన నేపథ్యంలో, తాజాగా ఈ అదనపు రైళ్లతో తెలుగు రాష్ట్రాల మధ్య ప్రయాణికులకు ఊరట లభించనుంది.

ప్రతి సంవత్సరం సంక్రాంతి సమయంలో హైదరాబాద్, సికింద్రాబాద్ నుంచి ఆంధ్రప్రదేశ్‌లోని వివిధ ప్రాంతాలకు భారీ సంఖ్యలో ప్రజలు ప్రయాణిస్తారు. ఈ రద్దీని తట్టుకునేందుకు రైల్వే శాఖ ఈ నిర్ణయం తీసుకుంది. ఈ 41 స్పెషల్ ట్రైన్స్ 2026 జనవరి 8 నుంచి 20 వరకు అందుబాటులో ఉంటాయని అధికారులు తెలిపారు.

రిజర్వేషన్ల వివరాలు :

ఈ స్పెషల్ ట్రైన్స్‌కు అడ్వాన్స్ రిజర్వేషన్లు డిసెంబర్ 14 (ఆదివారం) ఉదయం 8 గంటల నుంచి ప్రారంభమవుతాయి. IRCTC వెబ్‌సైట్, యాప్ లేదా రైల్వే కౌంటర్ల ద్వారా టికెట్లు బుక్ చేసుకోవచ్చు. ముందస్తు బుకింగ్ చేసుకోవడం మంచిదని రైల్వే అధికారులు సూచించారు, ఎందుకంటే రద్దీ ఎక్కువగా ఉండే అవకాశం ఉంది.సంక్రాంతి పండుగ (2026 జనవరి 14) సమీపిస్తున్న నేపథ్యంలో ఈ ఏర్పాట్లు ప్రయాణికులకు ఎంతో ఉపయోగకరంగా ఉంటాయని అధికారులు ధీమా వ్యక్తం చేశారు. మరిన్ని వివరాల కోసం రైల్వే అధికారిక వెబ్‌సైట్ లేదా ఎంక్వైరీ నంబర్ 139ను సంప్రదించండి.